Эҳ, биз - аёллар, гўзаллик учун нималарни қурбон қилмаймиз-а?! Баъзан гўзаллик учун гўзалликни қурбон қилиб юборганимизни кеч англаймиз. Масалан, текис сочни жингалак қилиш, жингалак сочимизни эса текислаш истагида уларни жилосиз, мўрт, синувчан қилиб қўямиз. Бўлар иш бўлди, энди сочларни ўз ҳолига қайтариш ва куйдирмасликнинг олдини олиш ҳақида маслаҳатларимизни ўқинг.

Дастёрларингизнииг энг сифатлисини танланг!

Соч учун мўлжалланган асбоблар соф керамикадан ёки металлдан ишлаб чиқарилади. Аммо асосий қисми металлдан ясалиб, уст қисмигагина керамикадан ишлов берилганлари ҳам йўқ эмас. Бу турдаги асбобларда вақт ўтгани сари чизиқлар пайдо бўлиб, керамик қоплам ейилиб кетиши натижасида, сочларга зарар етади. Энг яхшиси, бироз қимматроқ бўлса-да мутлақо керамикадан ясалган соч текислагичларини харид қилинг. Унинг қизиш кўрсаткичларига аҳамият беринг. Сочларни турмаклаётганингизда куйган ҳидини сезсангиз, қизиш даражасини пасайтиринг.

«Овсинжон, гўзаллик салонига бордингизми?»

Куйган сочларни парваришлашда гўзаллик салонларида бажариладиган амалиётлар ҳам бор. Қуйида улар билан таништирамиз.

Кератинли текислаш - сочларни силлиқлаш ва бир пайтнинг ўзида уни соғломлаштириш учун осонгина усул. Аммо нархининг анча қимматлиги ва натижа узоқ вақг сақланмаслигини инобатга олишни унутманг. Айниқса, ҳар куни сочларини ювишга одатланган аёл ва қизларга кератинли текислаш тавсия этилмайди. Чунки 1 ойга етмаёқ текис сочларингиздан асар ҳам қолмайди.

Ламинатлаш - ҳар бир соч толаси махсус косметик восита билан қопланади. Косметик қоплам асосини озиқлантирувчи ва намлантирувчи моддалар ташкил этади. Муолажадан сўнг бир ой давомида парваришланган ва ярқираб турган сочлардан завқ оласиз, сўнг қоплам ювилиб кетади.

Уй шароитида ҳам чораси бор!

Зарарланган сочларни витамин ва мойлар билан тўйинтириш керак. Бунинг учун бир неча хил ниқоблардан фойдаланиш мумкин.

Қатиқли. 100 гр. Қатиқни 1 ош қошиқдан кунгабоқар ёғи ва асал, 1 чой қошиқ соч бальзами билан аралаштиринг. Ниқоб сочларга чуқур сингиши учун озроқ крахмал солиб, сув буғида эритасиз ва соч илдизига суртасиз. 30-40 дақиқадан сўнг ниқобни илиқ сувда ювиб ташланг.

Асалли. 1 ош қошиқ асални сув буғида эритиб олинг-да, худди шу миқдорда сут ва бир неча томчи эфир мойидан қўшинг. Тайёр ниқобни сочнинг илдизидан тортиб учигача суртинг ва махсус қалпоқ кийиб, 2 соат юринг. Сўнг ювиб ташланг.

Тухумли. Иккита тухум сариғини аввал яхшилаб аралаштиринг. Сўнг 1 ош қошиқдан асал ва лимон шарбатини қўшинг. Даволовчи ниқобни сочларингизга суртиб, 1 соатга қолдиринг. Сочларни ювганингиздан сўнг лимон ёки грейпфрут шарбати қўшилган сувда чаясиз.

Кўк косметик лой. 1 чой қошиқ лойни шунча миқдордаги лимон шарбати, асал ва битта тухум сариғи билан аралаштириб, бўтқасимон ниқоб тайёрланг. Доривор бўтқани сочларга 30 дақиқага суртинг-да, сўнг озгина шампунь билан ювинг.

»Желатинли ламинатлашга нима дейсиз?

Желатин коллагендан таркиб топган табиий модда ҳисобланади. У сочларни фойдали моддалар билан тўйинтиради. Бундан ташқари, бу муолажа соч толасини қалинлаштириб, турмаклаш жараёнини осонлаштиради. Ламинатлаш учун:

3 ош қошиқ сув;

1 ош қошиқ желатин;

1 чой қошиқ бальзам ёки соч учун тайёр ниқоб керак бўлади.

Желатинга озроқ сув қуйиб, ивитинг. Бу вақт орасида сочларни ювиб, озгина қуритиб олинг. Ивиган желатинни бутунлай эриши учун сув буғига ёки микротўлқинли печга қўйинг. Сўнг желатинга бальзам ёки ниқобни қўшиб, дарров сочларга суртинг. Полиэтилен қалпоқ кийиб, устидан сочиқ ўранг-да, 2 соатдан сўнг ювинг. Бу усулни ҳафтада уч марта, сочларни ювганингиздан сўнг такрорласангиз, куйган сочлар ўз ҳолига қайтади.

Ниқобларни фақат зарурат туғилганида эмас, доимий тарзда бажаришга одатланинг. Ана шунда натижа сизни узоқ куттирмайди, сочлар эса доимо парваришланган кўринишга эга бўлади.