ru uz
Тор шим кийманг, целлюлитга чалинасиз

Билсангиз, целлюлит пархез ва очликни энг яқин дўсти! Негаки шундай холатларда зарурий моддалар, жумладан, оқсил керагича тушмайди. Кейин миямиз уни тери остидан олишга изн беради. Натижа, тери остидаги ёғларни тизгинлаб, теккис кўрсатувчи оқсил моддалар нимжонлашиб, ўз вазифасини уддалай олмай қолади. Мана шуни целлюлит дейишади. Эътибоор берган бўлсангиз, эркакларда ҳеч қачон бу нохушлик сезилмайди.чунки уларнинг териси аёлларникига нисбатан жуда қалин.

 Денгиз ўтлари фойда берадими?

Ҳа, чиндан ҳам олимлар денгиз ўтлари таркибида тери остидаги коллагенни яхшиловчи моддаларни аниқлашган. Бироқ уларни фақат истеъмол қилиш самарали экан. Тадқиқотлар турли ўраш муолажалари натижа бермаслигини кўрсатмокда. Қолаверса, бизнинг бозорлардан денгиз ўтларини топиш ҳам осонмас. Шунинг учун қўл остимиздаги воситалардан қўймасин.

Осон, аммо самарали усул

Агар сиз ҳам биз сингари қийшиқ-қинғир жойлашган ёғ қатламини текислашга қарор қилган экансиз, биринчи навбатда ўша қатламдан халос бўлишга интилишингиз керак. Бунинг учун жисмоний машқлар айни муддао. Лекин ўзингизни қийнаб, юзлаб километр югуришингиз шартмас.
Шунчаки, оёқ ёки қорин мушаклари учун мўлжалланган машқларни бажарсангиз, кифоя. Масалан, қорин билан ётиб, оёқларни имкон қадар тепароққа кўтариб, 10 сония ушлаб туринг. Машқни ҳар куни ўн беш мартадан такрорланг.

Шундан сўнг тизза ва қўлларингизни полга қўйиб, аввал ўнг оёғингизни 15 сония, сўнг чап оёғингизни юқорига кўтариб турасиз. Машқни ўн беш марта бажаринг.
Ишни эса йигирма мартадан уч бор ўтириб туриш билан якунлайсиз. Бир ой давомида ҳар куни эринмасдан шу машқларни бажарсангиз, муаммодан халос бўлганингизни ўзингиз ҳам сезмай қоласиз.

Мўъжизавий уқалаш

Бу амалиётга мурожаат қилар экансиз, қўл биланми ёки махсус вакуумли банкачалар ёрдамида уқайлайсизми, томирларга зиён етказмаслигига аҳамият беринг. Яъни жараёнда «Уқалаш қанча оғриқли кечса, шунча самарали» деган қоидани шиор қилиб олманг. Аксинча, керагидан ортиқ куч билан бажарилган муолажа терининг кўкариб қолишига олиб келади. Бу эса майда қон томирчалари ёрилди, дегани. Шундоқ ҳам қийинчилик билан етиб келаётган моддалар энди терининг айнан муаммоли қисмига келмай қўяди. Ҳаддан ортиқ жонбозлик кўрсатиб, ўзингизга жабр қилиб қўйманг, деймиз-да.

Яна бир муҳим қоида – оёқларни уқалашда пастдан юқорига қараб ҳаракатланиш лозим, қорин соҳасини эса айлана ҳаракатлар билан уқалаш талаб этилади. Амалиётнинг самараси мунтазамлиги билан белгиланади.

Скраб ёддан чиқмасин

Терини қалинлаштириш учун унинг эски қатламини олиб ташлаб, янгиси пайдо бўлишини рағбатлантириш талаб этилади. Бунинг учун скраблар айни муддао. Агар муолажани ҳар куни душ қабул қилаётганда амалга оширсангиз, бир неча ҳафтадаёқ фойдасини сезасиз. Истасангиз, махсус восита харид қилинг ёки душ учун гелингизга 1 ош қошиқ майдаланган қаҳвадан солиб қўйинг. Бундан ташқари, қаттиқ «мочалка» ва уқалаш учун мўлжалланган воситалар ҳам кўл келади.

Плёнка факат зиён етказади

Тор шим лимфа оқимининг бузилишига олиб келади. Натижада, коллаген қатламининг текислигига зиён етади. Баъзилар, ҳзтто, танаси сиқиб турадиган либосларда ёки қорин, бўкса, сон соҳасини плёнка билан ўраган ҳолда машқ қилиш фойда келтиради, деб ўйлашади. Аслида, бу ҳам қон айланишининг бузилишига хизмат қилиб, вазиятни янада мураккаблаштиради. Шунинг учун жисмоний машқларни кенг ва ўзингизга қулай либосларда бажаринг.

 

   Манба:  "Суғдиёна " газетаси

Орқага Чоп этиш