Бир қарашда бел оғриғи ва ҳомиладорлик бир-бирига боғликдек. Негаки, кўпчиликнинг тасаввурида ҳомиладор аёл белига қўлини тираган ҳолда акс этади. Шифокорларнинг фикрича, фарзанд кутаётган аёлда белнинг бироз толиқиши одатий ҳол. Аммо унинг узоқ вақт симиллаб оғриши, шу билан бирга, бошқа белгилар ҳамроҳлик қилишини меъёр деб бўлмайди. Мақоламиз орқали ҳомиладорлик давомида учрайдиган бел оғриқларининг сабаблари ва уларни бартараф этиш йўллари ҳакида сўз юритамиз.

«Табриклаймиз, сиз она бўласиз!»

Тухумҳужайра бачадон деворига ёпишаётган маҳал аёлни белдаги оғриқ қийнаши мумкин. Буни кўпинча аёллар ҳайз бошланишидан аввалги оғриқ деб ўйлайдилар. Аслида эса эндиликда янги меҳмон кутаётганларининг илк даракчисидир. Тўртинчи ҳафталикда йўлдош шакллана бошланишини ҳам белдаги оғриқ орқали сезишингиз мумкин. Бачадонга кўп миқдорда қон қуйилиши, шунингдек, бўғимларни юмшатувчи релаксин гормонининг қонда кўпайиши ҳам белнинг оғришига олиб келади. Мазкур оғриқларнинг ҳаммаси табиий бўлгани учун ўз вақтида дам олинса, дарров ўтиб кетади. Илк уч ойликда белдаги оғриқ қонталаш ажралмалар, бош оғриғи, қон босимининг кўтарилиш билан бирга кечсагина, хавотир олишингиз ўринли. Бундай пайтда, зудлик билан шифокорга мурожаат қилиш керак.

Безовталик тури қандай?

13-15-ҳафталарда қориннинг ёнида (белга яқин қисмида) оғриқ пайдо бўлиши бачадон мушаклари чўзилиб қолганидан дарак беради. Бундай пайтда ҳамма ишни ташлаб, камида 2 кун қимирламай ётиш керак. Безовталик ҳақида шифокорингизни ҳам огоҳлантирган маъқул. Яна бу даврдаги оғриқлар анча вазн қўшганингизни билдиради. Кўпроқ сут маҳсулотлари ва суюқ таомларга ўтиб, нонни чекланг.

Агар оғриқ хуружсимон кўринишда (бир тўхтаб, бир яна бошланиб) давом этса, бачадон гипертонус ҳолатда эканлигидан дарак деб билинг. Дарров шифокорга кўриниш зарур. 16-18-ҳафталардаги оғриқ пешоб ажратишдаги ачишиш билан кечса, ҳомиладорларда тез-тез учрайдиган пиелонефрит юз берган. Терапевт ёки уролог кўригидан ўтиб, бактерияларга қарши даволанишни кечиктирманг. 20-ҳафтадаги белдаги оғриқ бачадон кенгайиб, бел мушакларига босим беришидан келиб чиқади. Бу даврда йога машқлари ва бел соҳасини аста-секин уқалаш ёрдам беради.

22-ҳафтадан бошлаб белдаги оғриқ доимий тус олади. Бу ҳомиланинг ўсиши билан боғлиқ.

25-ҳафтадан белдаги оғриқ думғазагача боради. Лекин бу ҳам табиий ҳолат бўлиб, бошқа белгилар безовта қилмаса, хавотирга ўрин йўқ.

Туғруққа яқин...

Ҳомиладорликнинг учинчи уч ойлигида белнинг оғриши организмнинг туғруққа тайёрланаётганидан дарак беради. Тос суяклари етарли даражада очилиши учун бўғимлар анча юмшайди, лекин шу билан бирга, умуртқага таъсир қилиб, аёлда остеохондроз, умуртқа чурраси каби касалликларнинг ривожланишига олиб келади. Айнан шунинг учун белдаги оғриқ қанчалик оддий ва ўткинчи бўлишига қарамай, шифокор кўригида улар ҳақида, албатта, айтиб ўтиш зарур. Уз вақтида аниқланган касалликни ҳомиладорлик пайтида ҳам даволаса бўлади. Асосийси, шифокорни бу ҳақда огоҳлантириш. Баъзан организмда «мудраб» ётган буйрак, ўт-тош касаллиги, умуртқа чурраси, сколиоз айнан туғруққа яқин бош кўтариб, табиий туғруққа тўсқинлик қилади. Бундай пайтда аёл шифокор- невролог кўригидан ўтиб, тегишли кўрсатмаларни олиши, кундузи белдаги оғриқнинг камайишига хизмат қиладиган бандаж тақиши керак. Аёлнинг аҳволи оғирроқ бўлса, мисол учун, умуртқа чурраси йирик бўлиб, оғриқ зўрайса, туғруқ ке- сарча кесиш йўли билан амалга оширилади.

Манба:  "Суғдиёна " газетаси