Ёшу қарини бирдек ташвишга қўядиган бу касаллик кузда қайталашини яхши биласиз. Мабодо, бир марта цистит билан рўбару келган бўлсангиз, ҳар эҳтимолга қарши юзага келиши мумкин бўлган хуружларнинг олдини олиш ва зарур ҳолларда биринчи ёрдам кўрсатишни билиб қўйганингиз маъқул.

Цистит деб сийдик пуфагидаги бактериал яллиғланишга айтилади. Бу ҳолатда беморнинг тез-тез ҳожатга чиққиси келади, аммо пешоб кам ажралади, жинсий йўлларда ачишиш, оғриқ, иситма чиқиши, қорин шиши қийнайди. Тунда ҳаво салқинлашиши туфайли касалликнинг қўзғаш ҳолатлари кўпаяди.

Қандай даволаймиз?

1. Цистит бошланиши билан ҳамма ишларни йиғиштириб, камида 2 кун иссиқ ўраниб ётиш керак.
2. Кўпроқ суюқлик ичишни унутманг. Илиқ минерал (газсиз) сув, газандаўт, мойчечак, маккажўхори  попуги, гулхайридан тайёрланган, бир чимдим зира ёки қалампирмунчоқ (гвоздика) қўшилган чой сийдик йўлларидаги ачишиш, оғриқни дарров тўхтатади. Кўк чойга сут, 2 чақмоқ новвот қўшиб ичсангиз ҳам, оғриқ тез қолади. Муолажани ҳар 20 дақиқада, 2-3 соат давомида амалга оширсангиз, сийдик йўллари тез тозаланади ва ўзингизни анча тетик сезасиз.
3. Касаллик қўзғаган маҳал яқинликдан сақланинг. Акс ҳолда, хасталикни янада кучайтирган бўласиз. Борди-ю, нозик муносабатлар амалга оширилган бўлса, дарров пешоб ажратишга ҳаракат қилинг ва бактерияга қарши восита (дорихоналарда сотилади)да қинни тезда чайинг.
4. Ички кийимга эътибор беринг. Ёпишиб турувчи «стринг» кўринишидаги синтетик ички кийимлар, тор жинси шим кийиш ҳам муаммони янада кучайтиради. Ҳар кунлик тагликлардан фойдалинг.
5. Қабзиятдан сақланинг. Меъёрда ич келиши ҳар куни бўлиши керак. Агар ичингиз қотса, касаллик қайталайди. Бунинг олдини олиш учун, наҳорга, албатта, ивитилган ўрик қоқи дамламасидан ичинг.
6. Парҳезга риоя қилинг. Овқатланишда ишқорга бой маҳсулотлар енг, улар циститни келтириб чиқарувчи бактерияларни даф қилади. Салат барги, карам, саримсоқпиёз, кўкпиёз, қовун есангиз, касалликдан тезроқ қутуласиз.
7. Тарвузни уруғи билан енг, бу сийдик пуфагини инфекциядан тозалайди, пўстини эса қуритиб, майдаланг-да, ярим ош қошиғини наҳорга есангиз, касаллик тез чекинади. Кремли пишириқ, газли ичимликлар, пишлоқ, кетчуп, тузлама ва зираворларни чеклаган дуруст.

Қайталанса

Касаллик билан таниш бўлсангиз, биринчи  галда, шахсии гигиенага эътибор беринг. Кўп ҳолларда аёлнинг хушбўй қин чаювчи (интим) воситаларни қўллаши циститнинг қайталашига сабаб бўлади. Қинни чайишда энг яхши восита бу исириқ ўти дамламасидир. Улар бир зумда ачишиш, қичишиш белгиларини йўқотади.
Касаллик такрор рўй берса, албатта, баксуртма топшириб, аниқланган бактерияга қарши даволанишни бошланг. Цистит чириган тишлар, вақтида даволанмаган ангина, гайморит асорати ҳам бўлиши мумкин. Шунинг учун бундай инфекция ўчоқларини ўз вақтида бартараф этиш зарур. Муолажа вақти ҳар соатда зиғир уруғидан тайёрланган чой ичинг. Агар ишингиз уззукун бир жойда ўтириш билан боғлиқ бўлса, ҳар 40 дақиқада ўриндан туриб юринг. Ҳар икки соатда сийдик пуфагини бўшатишга ҳаракат қилиш ва ишдан кейин камида 1 соат давомида пиёда юриш керак.
Ширинмия илдизини қайнатиб, кун давомида ярим пиёладан ичиш ҳам сийдик йўлларини тозалайди ва оғриқдан халос қилади.

   Манба:  "Суғдиёна " газетаси