Қориннинг пастки соҳаси ҳамда киндик атрофидаги оғриқлар ҳомиладорликка хос бўлган ўзгаришлардан ҳисобланади. Бироқ безовталикнинг тез-тез қайталаниши бирор-бир патологиядан дарак бўлиши мумкин. Хўш, хавф мавжудлигини қачон ва қандай аломатлар орқали билишимиз мумкин?
Киндикдаги оғриқ ҳомиладорлик, хусусан, туғруқ вақти муаммо бўлмайдими?
Киндик соҳасидаги безовталик, одатда, ҳомиладорликнинг ўн учинчи ҳафтасига келиб ёки ундан сўнг бошланади. Оғриқ турли характерда бўлиши мумкин. Баъзан у санчиқли бўлса, баъзида симиллаган, лўқилловчи кўринишда кечади.

Ҳомила катталашгани сайин қорин териси чўзилади. Табиийки, киндик атрофи териси ҳам. Оғриқнинг энг кўп учрайдиган ва безиён изоҳи ана шу. Бачадон олди ва орқасида ичаклар жойлашган бўлиб, ҳомиладорликнинг кичик муддатларидаги оғриқлар кўпинча ичаклар ҳисобидан келиб чиқади. Ҳомиладорликнинг 7—9 ойларида киндик катталашиши мумкин. Апоневроз қавати киндик атрофида йиғилади. Айрим аёллар киндик тугунчасининг ташқарига чиқиб қолишидан шикоят қилишади. Аслини олганда, бунинг хавфли жойи йўқ. Туғруқдан сўнг киндик тугуни яна ўз ҳолига қайтади, аммо қорин мушакларини чиниқтиришга диққат қилинмаса, ушбу соҳа териси буришиб, эластиклигини йўқотиши мумкин.

Қорин чурраси эмасми?

Бу хасталик кўнгил айниши, қайт қилиш, томир уришининг тезлашиши, метеоризм ва ич бузилиши билан белги беради. Киндик соҳасидаги оғриқдан ташқари, қўл билан пайпасланганида тугунча борлиги сезилади. Хўш, у қандай пайдо бўлади? Биринчи сабаб бу қорин олд девори мушакларининг заифлигидир. Кейинги ўринларда ортиқча вазн, кўп ҳомилали ҳомиладорлик, қоғоноқ сувининг кўплиги, туғма нуқсонлар таъсири, ҳомиланинг катта вазнда эканлиги ҳамда организмнинг чурра хасталикларига мойиллигини кўриш мумкин. Хасталик ташхислангач, шифокор кўрсатмаси билан махсус бандажлардан фойдаланиш мумкин. Бандаж қорин мушакларига ёрдам бериб, ортиқча юкламадан ҳимоялайди. Туғруқдан сўнг шифокор-хирург текшируви ва даво чоралари ўтказилиши лозим.

Ичак инфекцияларидан эҳтиёт бўлинг!

Ингичка ичакнинг инфекциялар таъсирида касалланиши аввал қоринда, сўнг киндикда оғриқни пайдо қилади. Ичакда инфекция бор- йўқлигини мустақил била олмайсиз, аммо кўнгил айниши, қайт қилиш, диарея ва тана ҳароратининг кўтарилиши муаммо борлигидан дарак беради. Сизнингча, ичакка инфекция тушиши қай тариқа юз беради? Бунинг бир қанча изоҳи бор:

• ошқозон-ичак аъзоларининг сурункали касалликлари;
• меъда ости бези фаолиятидаги бузилишлар;
• овқатдан заҳарлниш;
• ичак гриппини келтириб чиқарувчи ротавирус инфекциялари;
• истеъмол маҳсулотларига аллергия; паразитлар.

Беморнинг ҳолати ҳамда тиббий текширувлар ичак инфекцияси борлигини тасдиқласа, шифокор махсус препаратларни буюради. Томчидорилар ҳам тайинланиши мумкин. Кўнгил айниши, қайт қилиш кузатилса ҳам, аёл оч юрмаслиги, кўпроқ суюқлик ичиши лозим.

Бачадон тонусда бўлса

Бачадон - ташқи шиллиқ қобиқ (периметрий), ўрта мушак қават (миометрий) ва ички шиллиқ қобиқ (эндометрий)дан иборат уч қисмли мушаклар массасидир. Тўлғоқ вақти силлиқ мушак тўқимаси қисқаради ва туғруқ юз беради. Нормал ҳолатда миометрий таранглашмайди. Агар у тонусда бўлса, қисқаради ва муддатдан эрта туғруқ юз бериши мумкин. Бачадон тонуси ҳомиладорликнинг биринчи уч ойлигида кузатилса, бу ҳомила тушиши ёки гипоксияга сабаб бўлиши эҳтимоли бор.

Бачадон тонусининг асосий белгиларига диққат қилинг: қориннинг пастки қисмида оғирлик, қорин мушакларининг таранглашиши, қўл билан пайпасланганда босим сезилади.

Эрта муддатларидаги бачадон тонуси прогестерон гормонининг етарлича ишлаб чиқарилмаётгани боис юзага келади. Кучли токсикоз, жинсий аъзолардаги сурункали ва ўткир яллиғланиш жараёнлари, инфекциялар ҳамда кўп ҳомилали ҳомиладорликда ҳам бачадон тонусининг ортиши эҳтимоли бор.

Патология аниқланганида шифокор мушаклар сиқилиши (спазми)ни енгиллаштирувчи препарат ва шамчаларни буюради. Аёл кўпроқ дам олиши, ўзини уринтирмаслиги лозим.

Аппендицит? Шунакаси ҳам бўладими?

Аппендикснинг яллиғланиши ва хуруж қилиши фарзанд кутаётган аёлларда кам кузатилса-да, патологияни бутунлай инкор қилиб бўлмайди. Унг биқинда ва ўнг қовурға остида кузатиладиган оғриқ, киндикка тарқалади. Тана ҳарорати кўтарилиши мумкин. Бундай вазиятларда зудлик билан шифокор кўригидан ўтиш лозим. Тиббий таҳлиллар кўричак хуружини тасдиқласа, мутахассислар қорин бўшлиғидаги ўсимтанинг олиб ташланиши ёки консерватив давосини муҳокама қилишади. Гарчи гап жарроҳлик ҳақида бораётган эса-да, бу фарзанд кутаётган аёл соғлигига хавф туғдирмайди.

 Манба:  "Суғдиёна " газетаси