Тозаликда гап кўп

Остеомиелит суяк ва иликда юз бераётган йирингли жараёндир. Мазкур касаллик гўдакликнинг илк даврида юз бериши мумкин. Кўп нарса нотўғри парваришдан келиб чиқади. Онанинг болани нотўғри эмизиши, мисол учун, бир кўкракни охиригача эмизиш пайти бўшатмаслик, туриб қолган сут билан юриш, шахсий гигиена қоидаларига эътибор бермаслик, елвизак натижасида мастит касалига йўлиқиш хасталикка туртки бўлади. Бола яллиғланиш бошланган кўкракдан эмиб, остеомиелит дардига чалинади. Шу билан бирга, гўдакдаги киндик ярасининг узоқ вақт битмаслиги ҳам касалликка сабаб бўлиши мумкин. Асли остеомиелитни стафилококк, стрептококк, сальмонелла, гемофил таёқча каби микроб-бактериялар қўзғатади. Тозаликка риоя қилинмаган жойда айнан шу микроб-бактерияларни топасиз.

Иммунитет тушмасин-да!

Арзимаган яра таъсирида ҳам ушбу хавфли касаллик юзага келиши мумкин. Шунинг учун терида йирингли, пуфакчали яралар ҳосил бўлиши биланоқ ўзбошимчалик қилиб уни даволаш ўрнига дарров шифокор жарроҳ ҳузурига бориб, ярага ишлов бериш керак. Касалликка олиб келувчи яна бир омил - чириган тишлар (кариес), гайморит, қулоқ оқиши, йиринглаши, ҳатто оддий томоқ оғриғи ҳам бўлиши мумкин. Маълумки, ушбу ҳолатлар тез-тез хасталанадиган, иммунитети паст болалар учун хос. Иммун тизими кучли бўлса, организм микроб-бактериялар ҳамласига бетаъсир бўлади. Айнан шунинг учун организда кечаётган ҳар қандай яллиғланишни ўз вақтида даволаб, қувватли овқат, дармондорилар ёрдамида иммунитетни кучайтириб бориш керак.

Қаерни зарарлайди?

Энг кўп оёқлар зарарланади. Баъзан қовурға, умуртқа, калла суяги, айниқса, юқори жағда ҳам асоратлар кузатилади. Бунда терида йирингли, суяккача борадиган яра юзага келиб, каттароқ ёшдаги болалар қўл-оёғининг қаттиқ оғришидан шикоят қилади. Оғриқ ҳаракат қилганда янада кучаяди. Шунинг учун бола имкон борича қўлига тегмасликка уринади. Чақалоқлар эса оғриқни йиғи, безовталик билан ифодалайди.

Бир белгига эътибор беринг, боланинг бир қўли пастга мажолсиз осилиб қолган. Ўзи эса ланж, ўйчан ёки аксинча, ўта безовта, йиғлоқи бўлиб қолади, эмишдан бош тортади. Тана ҳарорати 39-40 даражагача кўтарилади. Бунинг таъсиридан талваса тутиши мумкин. Оғриётган жой қизариб, шишиб кетади.

Тезроқ шифокорга.

Касаллик ортопед ҳамда жарроҳ шифоколар томонидан даволанади. Тиббий кўрикдан кейин шифокор экма (қон ва тери парчаси таҳлилини ўтказади, хасталикни қайси микроб- бактерия қўзғатгани аниқлангач, даво чоралари белгиланади. Асосан антибиотик воситалар ёрдамида муолажа қилинади. Зарурат туғилганда компьютер томография ва рентген текшируви ўтказилиши мумкин. Баъзи ҳолларда шифокор жарроҳлик йўли билан даволаш кераклигини айтади.

Зарарланган жой кесилиб, яра йирингдан махсус эритма ёрдамида тозаланади. Бундан ташқари, иммунотерапия усули кўлланилиб, қонга стафилококка қарши гамма глобулин воситаси юборилади. Кейинги босқичда дармон
дорилар ёрдамига таяниб, организм кучайтирилади. Касалликнинг ўткир давридан кейин лазер, электрофорез, парафин, озокерит, магнит билан даволаш каби физотерапия усулидан фойдаланилади.