Соғлом оила – соғлом жамият асоси
Ўзбекистон “Адолат” социал-демократик партияси Қорақалпоғистон Республикаси кенгаши томонидан ташкил этилган тадбирда партия фаоллари, халқ депутатлари Тахтакўпир тумани кенгашига “Адолат” социал-демократик партиясидан сайланган депутатлар, тиббиёт ходимлари иштирок этди. Унда Президентимиз раҳнамолигида аҳоли саломатлигини муҳофаза қилиш, тиббий хизмат сифати ва самарадорлигини юксалтириш, тиббиёт муассасалари моддий-техник базасини мустаҳкамлашга алоҳида эътибор қаратилаётгани таъкидланди.
Давлатимиз раҳбарининг 2009 йил 13 апрелдаги “Она ва бола саломатлигини муҳофаза қилиш, соғлом авлодни шакллантиришга доир қўшимча чора-тадбирлар тўғрисида”ги ҳамда 2009 йил 1 июлдаги “2009-2013 йилларда аҳолининг репродуктив саломатлигини мустаҳкамлаш, соғлом бола туғилиши, жисмоний ва маънавий баркамол авлодни вояга етказиш борасидаги ишларни янада кучайтириш ва самарадорлигини ошириш чора-тадбирлари Дастури тўғрисида”ги қарорлари бу борада муҳим омил бўлаётир.
Туман аҳолисининг 600 га яқини туғруқ ёшидаги аёллар бўлса, 10 минг 500 га яқини 14 ёшгача бўлган болалардир. Уларга тумандаги тиббиёт бирлашмаси, марказий поликлиника ҳамда 9 қишлоқ врачлик пункти тиббий хизмат кўрсатмоқда.
– Соғлом она ва бола йили муносабати билан партиянинг туман кенгаши иш-режаси асосида аҳоли ўртасида соғлом турмуш тарзини тарғиб этиш, аҳолининг репродуктив саломатлигини муҳофаза қилишга қаратилган қатор чора-тадбирлар, учрашув ва суҳбатлар ўтказилмоқда, – дейди Ўзбекистон “Адолат” СДП Тахтакўпир тумани кенгаши раиси ўринбосари Гулистон Зарликова. – Мутахассислар билан ҳамкорликда оналар ва болалар саломатлигини ҳимоя қилишнинг ҳуқуқий асослари хусусида атрофлича маълумот берилаётир.
Тадбирда аҳоли, айниқса, уйда бола тарбияси билан банд бўлган аёлларнинг тиббий маданиятини ошириш, мактаб ва мактабгача таълим муассасаларида болаларга кўрсатиладиган тиббий хизматлар ҳолатини доимий мониторинг қилиш бўйича фикр алмашилди.
Аминбой Ортиқбоев, ЎзА
Источник: uza.uz