Ўзбекистон Республикаси Соғлиқни сақлаш вазирлиги ва “Sen yolg‘iz emassan” республика жамоатчилик болалар жамғармаси ҳамда Республика болалар ижтимоий мослашув маркази ташаббуси билан ташкил этилган кўрикда тўрт юздан ортиқ боланинг саломатлиги, жисмоний ривожланиши юқори малакали шифокорлар томонидан ўрганилиб, зарур тавсиялар берилди.

– Мамлакатимизда ёш авлод саломатлигини муҳофаза қилиш, уларнинг ҳар томонлама соғлом ва баркамол улғайишига алоҳида эътибор қаратилмоқда, – дейди вилоят болалар кўп тармоқли тиббиёт маркази бўлим мудири Шуҳрат Улашов. – Кейинги икки йилда муассасамиз реконструкция қилиниб, энг сўнгги русумдаги тиббий жиҳоз ва ускуналар билан таъминлангани ҳам ана шу эътибор самарасидир. Икки кунлик тиббий кўрик давомида марказимизнинг юқори малакали педиатр, хирург, лор, эндокринолог, невропатолог ва бошқа мутахассислари болаларни кўрикдан ўтказди. Касаллиги аниқланган болаларнинг марказда даволаниши, малакали шифокорлар назоратида бўлиши таъминланди.

Самарқанд шаҳридаги 10-Меҳрибонлик уйида таълим-тарбия олаётган 118 нафар ўғил-қиз ҳам чуқурлаштирилган тиббий кўрикдан ўтказилди. Мутахассисларнинг хулосаларига кўра, олти нафар тарбияланувчида баъзи хасталиклар аниқланиб, улар мазкур тиббиёт марказида даволанадиган бўлди.

Манба: uza.uz