2015 йил 6 октябр куни “Туркистон” саройида «MIT.uz» Миллий интернет танлови ғолибларини тақдирлаш маросими бўлиб ўтди.

III Миллий интернет танлови «Камолот» ёшлар ижтимоий ҳаракати ҳамда қатор вазирлик ва ташкилотлар билан ҳамкорликда ташкил этилди. Танловдан кўзланган асосий мақсад – мамлакатимиз ахборот ресурслари ва сервисларини яратиш ҳамда ривожлантириш, ёшлар учун мўлжалланган, шунингдек, ахборот маданиятини шакллантиришга кўмаклашадиган сифатли интернет лойиҳаларини оммалаштириш, хавфсиз интернет маконини таъминлаш, иқтидорли ёшларни рағбатлантириш, ёш веб-дизайнер ҳамда дастурчиларни моддий ва маънавий қўллаб-қувватлаш, интернетда ёшлар сегментини янада кенгайтиришга қаратилган.

Ўзбекистон Республикаси Соғлиқни сақлаш вазирлиги расмий веб-сайти “Давлат бошқаруви соҳасидаги энг яхши сайт” номинацияси бўйича II ўринни эгаллаб, диплом ва қимматбаҳо совғалар билан тақдирланди.

Веб-сайт ўзбек, рус ва инглиз тилларида ишланган бўлиб, 2013 йилдан кўришда имконияти чекланганлар учун ҳам кириш имконияти яратилди. Шунингдек, сайтнинг мобил версияси ҳам ишга туширилган.

Тадбирда, бундан ташқари, “Йил мазмунига доир энг яхши сайт”, “Ўзбекистоннинг бой маданияти ва санъати, тарихи ҳамда истиқлол ғоялари ва маънавий қадриятларини ёритувчи энг яхши сайт”, “Маҳалла, қишлоқ ва шаҳарлардаги фаровон ҳаётни ёритган энг яхши сайт”, “Ўзбекистоннинг иқтисодий салоҳияти акс этган энг яхши сайт” ва бошқа қатор номинациялар бўйича ғолиблар аниқланди.

Танловда “Тиббиёт соҳасидаги энг яхши сайт” номинацияси бўйича I ўринни shifo.uz, II ўринни avitsenna.uz, III ўринни treatment.uz сайтлари қўлга киритди. Ғолибларга мукофотларни соғлиқни сақлаш вазири ўринбосари Л.Тўйчиев топширди. Номинация тиббиёт муассасаларининг беморларни хизматлар ҳақида интернет орқали хабардор қилиш соҳасидаги фаол қарашларини намоён этади.

Интернет танловининг ғолиб ва совриндорлари диплом ва қимматбаҳо совғалар билан тақдирланди.

«UzMedInfo» маркази

Ахборот хизмати