Муҳими: Она ва бола ҳамда аҳоли саломатлигига эътиборни кучайтириш

Ўзбекистон Республикаси Соғлиқни сақлаш вазирлиги қарори билан Хоразм вилояти туманларидаги 9 та қишлоқ врачлик пунктлари кафедралардаги профессор-ўқитувчиларга бириктирилди. Бизнинг "БКП, педиатрия ва олий ҳамширалик иши" кафедрасига ҳам Урганч туманидаги "Пахтакор" қишлоқ врачлик пунктига услубий, даволаш, ташкилий ишларда амалий ёрдам кўрсатиш белгиланган эди. Филиалимизда бу борада махсус штаб тузилиб, ҳар бир қишлоқ врачлик пунктига турли мутахассисликлардан иборат бўлган гуруҳ ташкил қилинди. Кафедрамиз томонидан Урганч туманидаги барча ҚВПларга янги даволаш, ташҳис стандартлари, касалликларнинг замонавий таснифи, болаларга стационар ёрдами кўрсатиш тўғрисидаги янги ўқув дастурлари, шунингдек, Соғлиқни сақлаш вазирлигининг 80-буйруғи нусхаси, демографик кўрсаткичларни ҳисоблаш бўйича услубий қўлланмалари тақдим этилди. Гуруҳдаги белгиланган профессор-ўқитувчилар томонидан жадвал асосида ҚВПда тиббий кўрик, меъёрий ҳужжатлар таҳлили, ҚВП фаолияти ўрганилди. 687 та туғиш ёшидаги аёллар кўрикдан ўтказилиб, аниқланган касалликлар бўйича 118 та аёл соғломлаштирилди. ҚВП ходимлари ўртасида суҳбатлар, аҳоли ўртасида учрашувлар ва бундан ташқари Урганч туман алоқа ва саноат касб-ҳунар коллежида ўқитувчилар ва талабалар билан учрашув ҳамда суҳбатлар олиб борилди. Фертил ёшидаги аёллар ва ўсмирларда УЗИ текшируви ўтказилиб, аёлларга кўрсатма бўйича контрацептив воситалар қўлланилди. Филиал билан шартнома асосида ҳамкорлик ўрнатиб келаётган Жанубий Кореянинг "ЕВХА" аёллар тиббиёт университети профессор-ўқитувчилари билан биргаликда Урганч туманидаги "Ғалаба" ва "Пахтакор", Янгибозор туманидаги "Уйғур" ҚВПларига ташриф буюриб, у ердаги аҳоли тиббий кўрикдан ўтказилиб, аниқланган беморлар учун ҳар бир ҚВПга 524 минг сўмлик бепул дори-дармон тарқатилди. Бундан ташқари, юқоридаги номлари келтирилган ҚВПларга қон босимини ўлчовчи компьютерли тонометр, қондаги қанд миқдорини текширувчи гликометр тақдим этилди. Кафедрамиз томонидан Урганч туман "Пахтакор" ҚВПсига замон талабига жавоб берадиган стендлар тайёрлаб берилди. Ҳафтада икки марта қишлоқ врачлик пунктига бориш режалаштирилган. Гуруҳимиз билан Урганч туманидаги барча ҚВП мудирлари ва умумий амалиёт шифокорларига танланган мавзулар бўйича семинар ва амалий анжуманлар ўтказиб келдик.

Демак, бу фаолиятлар яна узлуксиз тарзда давом эттирилиб, ўсиб келаётган авлодни соғлом вояга етказиш, уларни маънавий етук қилиб тарбиялаш – соғлиқни сақлаш ходимлари зиммасига катта масъулият юклайди. Баркамол авлодни вояга етказишда, аҳолининг тиббий саводхонлигини оширишда биз педагог ва шифокорлар ўз меҳнатларимизни аямаймиз. М. АлимуҲамедова, С. ХудОйназарова, Тошкент тиббиёт академияси Урганч филиали ўқитувчилари.