Шу билан бирга, 2008 йил 1 июлдаги 0253-08-сонли Санитария қоидалари ва меъёрлари талабларига кўра тиббий фаолиятда диагностика ва даволашнинг қон билан боғлиқ усулларини қўллашни назарда тутувчи даволаш-профилактика муассасаларида марказлаштирилган стерилизация бўлимини ташкил этиш белгиланган. Мазкур талаблардан келиб чиққан ҳолда, хусусий тиббий амалиёт билан шуғулланувчи 550 нафарга яқин жисмоний шахслар (соҳада фаолият олиб бораётган жисмоний шахсларнинг 93 фоизи) ҳам фаолият тури бўйича махсус таълим олган ходимга эга бўлган марказлаштирилган стерилизация бўлимига эга бўлиши лозим. Аммо, хусусий тиббий амалиёт билан шуғулланувчи жисмоний шахснинг "Юридик шахс ташкил этмаган ҳолда якка тартибдаги тадбиркор" мақомига эга бўлганлиги сабабли, унинг ихтиёрида махсус таълим олган ходимнинг бўлиши Ўзбекистон Республикасининг "Тадбиркорлик фаолияти эркинлигининг кафолатлари тўғрисида"ги Қонуни 6-моддаси талабларига зиддир. Яъни, ушбу моддага кўра якка тартибдаги тадбиркорлик якка тартибдаги тадбиркор томонидан ходимларни ишга ёллаш ҳуқуқисиз, мустақил равишда амалга оширилиши зарур.

Юқорида таъкидлаб ўтилганлардан кўриниб турибдики, тиббий фаолиятни лицензиялашда рухсат этилган барча тиббий ихтисосликлар бўйича хусусий врачлик (якка тадбиркорлик) фаолияти ташкил этилиши, аҳолига сифатли тиббий хизмат кўрсатиш жараёнида давлат ва хусусий тизим тиббий муассасалар учун бирдек мажбурий бўлган даволаш ва ташҳис қўйишнинг стандартларига тўлиқ риоя этилишини кафолатлай олмайди. Яъни, хусусий тиббиёт амалиёти билан шуғулланувчи жисмоний шахслар томонидан даволаш ва диагностика стандартларининг бузилиш ҳолатлари кўплаб учраётганлиги фуқароларнинг ҳаёти ва соғлиғига реал даражада хавф туғдиришига олиб келади. Бу эса ўз навбатида, аҳолига кафолатланган ва малакали тиббий ёрдам кўрсатиш манфаатларига мос келмайди. Ушбу ҳолатлар эса ўз навбатида Ўзбекистон Республикасининг "Фуқаролар соғлиғини сақлаш тўғрисида"ги Қонунига тегишли ўзгартишлар киритишга асос бўлиб хизмат қилди.

Шу боисдан, ушбу вазифани самарали бажариш мақсадида, Ўзбекистон Республикаси Олий Мажлиси Қонунчилик палатаси томонидан "Фуқаролар соғлиғини сақлаш тўғрисида"ги Ўзбекистон Республикаси Қонунининг 10 ва 11-моддаларига ўзгартишлар киритиш ҳақида"ги Ўзбекистон Республикасининг Қонуни 2009 йил 18 ноябрда қабул қилиниб, 2010 йил 7 майда Сенатнинг иккинчи ялпи мажлисида маъқулланди ҳамда 2010 йил 20 май куни матбуотда эълон қилиниб, кучга кирди. Таъкидлаш жоизки, ушбу Қонун "Фуқаролар соғлиғини сақлаш тўғрисида"ги Ўзбекистон Республикаси Қонунининг "Соғлиқни сақлашнинг хусусий ва бошқа хил тизимлари" деб номланган 10-моддаси ҳамда "Тиббиёт ва фармацевтика фаолиятини лицензиялаш" деб номланган 11-моддасига киритилган ўзгартишлар эндиликда жисмоний шахсларнинг хусусий тиббий амалиёт билан шуғулланиш ҳуқуқини истисно этади. Бир сўз билан айтганда, мазкур Қонун орқали "Фуқаролар соғлиғини сақлаш тўғрисида"ги Ўзбекистон Республикаси Қонунининг 10-моддаси биринчи қисмига киритилган ўзгартишларнинг мазмун-моҳиятига кўра, соғлиқни сақлашнинг хусусий ва бошқа хил тизимлари жумласига эндиликда ўз маблағлари, жалб этилган маблағлар ва қонун ҳужжатларига мувофиқ бошқа манбалар ҳисобидан молиялаштириладиган даволаш-профилактика, дорихона муассасалари, тиббиёт ва фармацевтика маҳсулотлари ишлаб чиқарадиган корхоналар, шунингдек, хусусий фармацевтика фаолияти билан шуғулланувчи жисмоний шахслар кириши белгиланди. Бундан ташқари, "Фуқаролар соғлиғини сақлаш тўғрисида"ги Ўзбекистон Республикаси Қонунининг 11-моддаси биринчи қисмида тиббий фаолият тегишли лицензияга эга бўлган юридик шахслар томонидан, фармацевтика фаолияти эса тегишли лицензияга эга бўлган юридик ва жисмоний шахслар томонидан амалга оширилиши мумкинлиги назарда тутилди.
Страница 4 - 4 дан 5
Бош | Олдинги. | 1 2 3 4 5 | Кейинги. | Охири | Хаммаси