Маълумки, "Тадбиркорлик фаолияти эркинлигининг кафолатлари тўғрисида"ги Ўзбекистон Республикаси Қонунининг 4-моддасида белгиланган тартибда рўйхатдан ўтган ҳамда тадбиркорлик фаолиятини амалга ошираётган юридик ва жисмоний шахслар тадбиркорлик фаолияти субъектлари бўлиши назарда тутилган. Тиббий хизматлар кўрсатиш соҳасидаги тадбиркорлик субъектлари тоифасининг фаолияти эса "Фуқаролар соғлиғини сақлаш тўғрисида"ги Ўзбекистон Республикаси Қонунининг 10 ва 11-моддалари ҳамда бошқа норматив-ҳуқуқий ҳужжатлар билан тартибга солинган. Бу ўринда, статистик маълумотларга қараганда, 2009 йилнинг 1 май ҳолатига кўра, мамлакатимизда 1590 та хусусий тиббиёт муассасалари ва 1187 нафар жисмоний шахслар хусусий тиббиёт амалиёти билан шуғулланиб келган. Таъкидлаш жоизки, Ўзбекистон Республикаси Президентининг 2007 йил 19 сентябрдаги "Соғлиқни сақлаш тизимини ислоҳ қилишни янада чуқурлаштириш ва уни ривожлантириш давлат дастурини амалга оширишнинг асосий йўналишлари тўғрисида"ги ПФ-3923-сонли Фармонида соғлиқни сақлаш тизимини ислоҳ қилишни янада чуқурлаштириш борасидаги асосий вазифалар белгилаб берилган бўлиб, улар орасида замонавий диагностика ва даволаш ускуналарига, юқори малакали тиббиёт ходимларига эга бўлган, аҳолига даволаш жараёнининг тасдиқланган стандартларига мувофиқ равишда сифатли ихтисослаштирилган тиббий хизмат кўрсатадиган хусусий тиббиёт муассасаларини ривожлантиришга кўмаклашиш ҳам назарда тутилган эди.

Бундан ташқари, Ўзбекистон Республикаси Президентининг 2007 йил 2 октябрдаги "Республика тиббиёт муассасалари фаолиятини ташкил этишни такомиллаштириш чора-тадбирлари тўғрисида"ги ПҚ-700-сонли Қарори билан хусусий тиббиёт муассасалари зиммасига бир қатор мажбурий талаб ва шартларни бажарганлари тақдирда аҳолига тиббий хизмат кўрсатишга ҳақли бўлишлари белгиланиб, бу талаб ва шартлар жумласига, биринчидан, тиббиёт муассасаси даволаш фаолиятини фақат Ўзбекистон Республикаси Вазирлар Маҳкамаси томонидан тасдиқланадиган рўйхатга биноан муайян турдаги ихтисос йўналиши бўйича амалга ошириши; иккинчидан, диагностика ҳамда даволаш ускуналаридан иборат замонавий моддий-техник базанинг мавжудлиги; учинчидан, диагностика ва даволаш фаолиятининг муассаса штатида турадиган, тегишли мутахассислик бўйича малака тоифасига эга бўлган юқори малакали тиббиёт ходимлари томонидан мустақил равишда амалга оширилиши; тўртинчидан, тиббиёт муассасаси фаолиятининг фақат даволаш жараёни стандартларига жавоб берадиган бино ва хоналардагина ташкил этилиши киради. Аммо, ўтган давр мобайнида ваколатли давлат органлари томонидан амалга оширилган мониторинг натижалари хусусий тиббий амалиёт билан шуғулланувчи жисмоний шахслар фаолиятида жиддий камчиликлар мавжудлигини кўрсатди. Жумладан, хусусий тиббий амалиёт билан шуғулланаётган жисмоний шахсларнинг аксарияти даволаш жараёни стандартларига, санитария ва гигиена қоидаларига, асбоблар ва материалларни стерилизация қилиш, фойдаланилган тиббий буюмларни зарарсизлантириш, утилизация ва йўқ қилиш талабларига риоя қилмасдан тиббий хизматлар кўрсатишган. Бундан ташқари, санитария нормалари талабларига жавоб бермайдиган биноларда хизмат кўрсатиш, метрологик кўрикдан ўтказилмаган тиббий асбоб-ускуналардан фойдаланиш каби салбий ҳолатлар аниқланган. Шунингдек, хусусий тиббий амалиёт билан шуғулланиш ҳуқуқини берувчи лицензияга эга бўлган жисмоний шахслардан амалда қарийб ярмигина фаолият кўрсатаётганлиги, аксарияти эса у ёки бу сабабларга кўра ишламаётганлиги аниқланган. Бундан ташқари, 400 га яқин хусусий тиббий амалиёт билан шуғулланувчи жисмоний шахслар Ўзбекистон Республикасининг "Фуқаролар соғлиғини сақлаш тўғрисида"ги Қонуни 10-моддаси талабларига хилоф равишда бирламчи тиббий ҳужжатларни юритмаган ва статистик маълумотларни тақдим этмаган. Зеро, ушбу Қонуннинг мазкур моддасида ҳамда "Тадбиркорлик фаолияти эркинлигининг кафолатлари тўғрисида"ги Қонуннинг 17-моддасига мувофиқ, соғлиқни сақлашнинг хусусий ва бошқа хил тизимлари белгиланган тартибда тиббий ҳужжатларни юритиши ҳамда статистика маълумотларини тақдим этиши, ўз навбатида беморларнинг малакали тиббий хизмат олишларини ҳимоя қилиш ҳамда тиббиёт ходимларининг касбий фаолияти билан боғлиқ бўлган суд ишларида уларнинг ҳуқуқий ҳимоясини таъминлашда муҳим аҳамият касб этади.
Страница 3 - 3 дан 5
Бош | Олдинги. | 1 2 3 4 5 | Кейинги. | Охири | Хаммаси