Инсон ҳаёти учун муҳим бўлган соҳалардан бири – соғлиқни сақлаш тизимини такомиллаштириш ва аҳолига тиббий хизмат кўрсатиш сифатини ошириш масалалари давлат сиёсатининг устувор йўналишларидан бири бўлиб ҳисобланади. Бинобарин, истиқлол шарофати билан мамлакатимизда аҳолининг малакали тиббий хизматдан фойдаланиш ва ижтимоий ҳимояга доир конституциявий ҳуқуқларини таъминлаш, шунингдек, тиббий хизматларнинг сифатини яхшилаш учун ташкилий, иқтисодий ва ҳуқуқий шарт-шароитларни яратиш, соғлом авлодни тарбиялаш, соғлиқни сақлаш тизимини мамлакатда амалга оширилаётган ижобий ўзгаришларга мос тарзда ислоҳ этиш борасида бир қатор чора-тадбирлар амалга оширилмоқда.

Мамлакатимиз раҳбари Ислом Каримовнинг Ўзбекистон Республикаси Конституцияси қабул қилинганининг 17 йиллигига бағишланган тантанали маросимдаги маърузасида таъкидланганидек, биргина 2009 йилда барча қишлоқ туманларининг марказий шифохоналари умумий қиймати 12 миллион доллар бўлган тиббий анжомлар, 44 та "Уаз" санитария машинаси, 280 та "Дамас-амбуланс" тез ёрдам машинаси билан таъминлагани, қишлоқ врачлик пунктларига 1 миллион доллар миқдорида тиббий лаборатория анжомлари етказиб берилган. Албатта, мазкур ижобий ютуқларга эришишга хизмат қилаётган соҳага оид қонун ҳужжатлари муҳим ўрин эгаллайди. Шу мақсадда, мамлакатни модернизация қилиш ва кучли фуқаролик жамиятини барпо этиш шароитида ижтимоий соҳага, хусусан соғлиқни сақлаш соҳасини ҳуқуқий тартибга солишга устувор йўналиш сифатида эътибор бериб келинмоқда. Жумладан, ушбу соҳада ҳам босқичма-босқич амалга оширилаётган ислоҳотлар ҳуқуқий жиҳатдан асослантирилган, яъни бугунги кунда яхлит тизимга эга бўлган ҳуқуқий майдонда олиб борилмоқда. Хусусан, бугунги кунда 176 та махсус норматив-ҳуқуқий ҳужжатлар, жумладан 12 та қонун, Ўзбекистон Республикаси Президенти-нинг 33 та Фармон ва Қарорлари, Вазирлар Маҳкамасининг 77 та қарори, вазирликлар, давлат қўмиталари ва идораларнинг Адлия вазирлигида давлат рўйхатидан ўтказилган 54 та ҳужжатлар, шунингдек, 230 дан ортиқ бошқа норматив-ҳуқуқий ҳужжатлар ҳам соғлиқни сақлаш соҳасидаги у ёки бу муносабатларни ҳуқуқий тартибга солишга хизмат қилмоқда.

Умуман олганда, ўтган мустақиллик йилларида фуқаролар соғлиғини сақлаш соҳасида қабул қилинган норматив-ҳуқуқий ҳужжатларнинг маъно-моҳияти ва аҳамияти ҳақида сўз юритганда, бу даврни иккига бўлишга тўғри келади. Ҳеч шубҳасиз, босқичма-босқич амалга оширилган бу даврларнинг ҳар бири мамлакатимизда аҳолининг соғлиғини сақлаш борасида амалга оширилган чора-тадбирлар тизимида ўзига хос ўрин эгаллади, десак муболаға бўлмайди.

Албатта, аҳоли саломатлигини муҳофаза қилиш, энг аввало соғлиқни сақлаш тизимида амалга оширилаётган ҳуқуқий ислоҳотларнинг амалий натижалари билан узвий боғлиқдир. Жумладан, фуқаролар соғлиғини сақлаш тизимида ислоҳотларни амалга оширишнинг биринчи босқичида (1991-2000 йиллар) Ўзбекистон Республикасининг "Фуқаролар соғлиғини сақлаш тўғрисида"ги Қонуни (1996 й.), Ўзбекистон Республикаси Президентининг 1998 йил 10 ноябрдаги ПФ-2107-сонли Фармони билан маъқулланган "Ўзбекистон Республикаси соғлиқни сақлаш тизимини ислоҳ қилиш Давлат дастури", Ўзбекистон Республикаси Вазирлар Маҳкамасининг 1996 йил 14 августдаги "Ўзбекистон Республикасида тиббиёт ва фармацевтика саноатини ривожлантиришни давлат томонидан қўллаб-қувватлаш чора-тадбирлари тўғрисида"ги 283-сонли қарори, Ўзбекистон Республикаси Вазирлар Маҳкамасининг 2000 йил 15 февралдаги 46-сонли қарори билан тасдиқланган "Соғлом авлод" Давлат дастури каби ўнлаб қонун ҳужжатлари қабул қилинди.

Страница 1 - 1 дан 5
Бош | Олдинги. | 1 2 3 4 5 | Кейинги. | Охири | Хаммаси