Бу маккор хасталик, айниқса, ёш болаларда яширин кечади. Афсус, организмга ўрнашиб олганида даволаш анча қийин кечиши мумкин. Аммо душманнинг ўзига хос белгилари борки, уларни сезгач, касалликни тез ва самарали даволаш имкони пайдо бўлади. Цистит нима сабабдан юз беришини билиб олсак, унга қарши ҳимоя тайёр деяверинг.
Тозаликка эътибор беринг

Айниқса, қиз болалар парваришида гигиена қоидаларига амал қилиш муҳим. Қиз болаларнинг сийдик чиқарув канали қисқа бўлгани учун тозаликка риоя қилинмаса, циститга тез-тез чалиниши мумкин. Боланинг ости юқоридан пастга қараб ювилади, бунда цистит пофилактикаси сифатида мойчечак ёки исириқ дамламасидан фойдаланиш мумкин. Қўллашдан аввал дамламани стерил докада сузиб олишни унутманг.

Фарзандингизнинг ички кийимини ҳар куни алмаштириш кийдиришдан аввал, албатта, дазмоллаш керак.

Гижжани йўқотиш керак!

Қилгижжа осонлик билан сийдик йўлларига ўтади. Агар бола пешоб ажратаётган пайтда йиғласа, ачишиш сезса, дарров нажас таҳлилини топширинг. Ушбу таҳлилни барча оила аъзолари ҳам топширишлари шарт.

Илк белгиси — оғриқ

Бола ҳожатга тез-тез борадиган, аммо у ердан йиғлаб чиқадиган бўлиб қолади. Негаки, пешоб ажратиш ачишиш, қизиш ва қичишиш белгилари билан бирга кечади. Бундан кейин ҳам эътибор берилмаса, кичкинтойнинг ҳарорати кўтарилиши мумкин. Эътиборли оналар пешобнинг ранги ва ҳиди ўзгарганлигини ҳам сезади.

Чириган тишларни даволанг!

Чириган тишлар (кариес), томоқнинг тез-тез оғриши, димоғдаги касалликлар циститга олиб келиб, кейин ҳам касалликнинг қайталанишига сабаб бўлади. Цистит давоси ушбу аъзоларнинг соғломлигига боғлиқ.

Ўзбошимчалик ярамайди!

Циститни замбуруққа қарши қўлланадиган дорилар, кучли антибиотиклар билан билиб-билмай даволаш касалликни янада зўрайтиради. Шунинг учун, шифокорга бориб, таҳлил ва тиббий текширувлар асосида муаммонинг асл сабабини аниқлаган дуруст. Акс ҳолда, асорат сифатида пиелонефрит, гломерулонефрит каби хавфли хасталикларга юз тутиш мумкин. Касаллик қайталанмаслиги учун ҳар олти ойда болалар шифокори ёки болалар урологи ҳузурига келиб, текширувдан ўтиши, яллиғланиш ўчоқлари (тиш, томоқ, бурун) ҳамда бўқоқ, дармонсизлик, камқонликни ўз вақтида даволаш лозим.

Тезроқ таҳлил топширинг

Хасталикни фош этишда қон ва сийдик таҳлили топширилади. Таҳлиллар аниқ бўлиши учун сийдикнинг бактериологик текшируви талаб этилади. УТТдан ҳам ўтиш шарт.

Ором олиш ва иссиқлик

Даволашда бактерияга қарши дори-дармонлар ҳамда антибиотиклардан фойдаланилади. Инфекция тезроқ организмдан чиқиб кетиши учун 1 литргача суюқлик (лимонли, олма ва сутли ширин чой) ичириш керак. Шунингдек, дала қирқбўғими ёки шивит уруғи дамламасини чой ўрнига кун давомида ярим пиёладан ичириш яхши фойда беради. 1 ой давомида цитрус ва нордон таъмли фаст-фуд таомлар (айниқса, чупа-чупс, қотган нон, кетчуп ва майонез солинган таомлар, ширинлик, ҳатто сақич, газли ичимликлар, қовурилган картошка) қатъиян мумкин эмас.

Овқатланишда ширин таъмли мевалар, сутли бўтқалар, суюқ таомлар, айниқса, балиқ шўрва фойдали        

   Манба:  "Суғдиёна " газетаси