Ҳудудий ДСЭНМ эпидемиология бўлимлари мутахассислари учун семинар йиғилиш
2015 йил 19 май куни Соғлиқни сақлаш вазирлиги Республика Давлат санитария-эпидемиология назорати марказида Тошкент шаҳар, вилоятлар ва Қорақалпоғистон Республикаси Давлат санитария-эпидемиология назорати марказларининг эпидемиология бўлими мутахассислари учун “Вирусли гепатитлар эпидемик жараёнига замонавий ёндашув ва вирусли гепатит А (ВГА) га қарши эмлашнинг роли” мавзуси асосида ҳамда Соғлиқни сақлаш вазирининг 2015 йил 25 мартдаги “Республика аҳолиси ўртасида ич терлама, паратиф, сальмонеллёз ва ўткир ичак касалликларга қарши олиб борилаётган чора-тадбирларни такомиллаштириш тўғрисида” №122-сонли янги буйруғи муҳокама қилинди.
Республика миқёсидаги семинар йиғилишини Республика ДСЭНМ бош врачи Б.И.Алматов очиб берди. У сўнги йилларда юқумли касалликларни олдини олиш, айниқса ичак гуруҳи касалликларига қандай эътибор берилаётганлиги ҳақида тўхталиб ўтди.
Республика ДСЭНМ эпидемиология бўлими мудири т.ф.н Л.В.Кудашева сўзга чиқиб, республикада вирусли гепатит А касаллигига қарши курашда сезиларли ютуқларга эришилганлиги, шу билан бир қаторда вирусли гепатит касалликларини профилактикаси долзарб муаммо бўлиб қолаётганлиги гапириб ўтди. Юқумли касалликларнинг умумий структурасига кўра (грипп ва ўткир респиратор инфекцияларидан ташқари) вирусли гепатитларнинг солиштирма оғирлиги 26,5 % ни ташкил этади. Кўпинча вирусли гепатит А касаллиги билан мактабгача таълим ёшдаги болалар ва кичик мактаб ёшдаги болалар, биринчи ўринда шахсий гигиена қоидалари бўйича билимга эга бўлмаганлар касалланадилар.
Республика ДСЭНМ эпидемиология бўлими мудири Л.В.Кудашеванинг айтишича, охирги йилларда аҳоли ўзларининг болаларини хусусий эмлаш пунктларида вирусли гепатит А касаллигига қарши эмлаш ишлари ўтказилмоқда. Ҳозирги вақтдаги эмланаётган вирусли гепатит А касаллигига қарши вакцина зарарсиз бўлиб, юқори иммуногенлик хусусиятга эга. Эмлашдан сўнг асоратлар кузатилмайди.
Семинар кун тартибига киритилган Соғлиқни сақлаш вазирининг 122-сонли “Республика аҳолиси ўртасида ич терлама, паратиф, сальмонеллёз ва ўткир ичак касалликларга қарши олиб борилаётган чора-тадбирларни такомиллаштириш тўғрисида”ги янги буйруғи ҳамда қорин тифи ва паратиф касалликлари эпидемиясига қарши олиб борилаётган чора тадбирлар дастури муҳокама қилинди.
Бухоро вилояти ДСЭНМ иммунология бўлими мудири Б.Ж. Баракаев вирусли гепатит А касаллигига қарши кураш бўйича ўз иш тажрибаларини ўртоқлашди. Вилоят ҳудудида қандай чора тадбирлар ўтказилаётганлигини айтиб ўтди. Профилактик эмлашни ўтказишда санитария-эпидемиология ва педиатрия хизматларини ўзаро бирикиши лозимлигини таъкидлаб ўтди.
Семинар сўнгида Тошкент шаҳар, вилоятлар ва Қорақалпоғистон Республикаси ДСЭНМ эпидемиология бўлими мутахассислари вирусли гепатит А касаллиги эпидемиясига қарши ўтказилаётган чора - тадбирларни янада такомиллаштириш бўйича ўз таклифларини беришди.
Республика миёқсида ўтказилган семинар йиғилиш интерактив тарзда ўтди, бу эса мутахассисларда юзага келган муаммолар ва уларни ечими борасида эркин баҳс - мунозара юритишга имкон берди.