ru uz
Хина давосидан бебахра колманг
Хина давосидан бебахра колманг

Шарқ мамлакатларида хинадан яраларни дизенфекциялашда, суяк касалликларини даволашда, стоматологик хасталикларда ва артритни бартараф этишда фойдаланилган. Меҳенди ҳам саломатлик мақсадида келиб чиққан санъатдир. Айниқса, терининг замбуруғли касалликларида (оёкдан нохуш ҳид келганида) хинадан турли нақшлар чизилган.

Хинанинг ҳозирги пайтга келиб 5 хил бўяш усули бор: арабча, ҳиндча, марокашча, осиёча ва европача. Ҳар бир усул бир-биридан нақшлари ва суратлари билан фарқ қилади. Дидингизга мосини танлаб чиздираверасиз. Истасангиз, 5 услубни мужассамлаштиришингиз ҳам мумкин.

Гуллар ва мевалар суратини ички дунёси бой, ҳаётидан мамнун ва бахтли инсонлар танлашади.

Қалампир кўринишидаги нақш, асосан, бўлажак келинларга бахт, тинчлик, тўкинлик, фарзанд тилаб чизилади.

Уруғ - одатда қалампирнинг ёнида ёки асосий нақшнинг марказига чизилади ва бахт-саодатни англатади.

Пат — ҳаётга бўлган муҳаббат, қатъийлик, ўзига ишонганлар чиздирадиган суратдир.

Товус — ғурур, қуёш эса гўзаллик ва ўзгача қобилият рамзидир.

Кичик тавсияларимиз ҳам бор.               

Меҳенди чиздиришдан 1—2 кун аввал, терингизни ортиқча туклардан тозалаб олинг. Шунда сурат бир текис чизилади, тери эса майин ва бежирим кўринади.

Чўмилиш ҳавзасига отланишдан аввал, меҳенди чизилган жойларга бодом ёғидан ёки қуёшдан ҳимояловчи кремдан суртиб олинг.

Хина суртилган терига сув бемалол кира олади, шундай экан, таҳоратда ҳам, ғуслда ҳам хинани ўчиришингиз шарт эмас.

2 ҳафтадан сўнг ўз рангини йўқота бошлаган нақшларни чўмилиш жараёнида оддий «мочалка» билан ишқаласангиз кетади.

Тери касалликларининг олдини олган ҳолда, 1 ойда тананинг бир қисмида икки мартадан кўп меҳенди чизиш мумкин эмас.

Табиий хинанинг яроқлилик муддати 12 ой ҳисобланади. Шундай бўлса ҳам тўғри сақланган хина биринчи уч ойдагина ёрқин рангли из қолдиради. Ундан сўнг эса хиралашиши мумкин. Агар қадокда яроқлилик муддати ёзилмаган бўлса, унинг кўринишига қараб ҳам янги ё эскилигини аниқлаш мумкин. Агар конуссимон тюбик худди ёрилиб кетадигандек шишиб турса ва уни сиқиш қийинчилик туғдирса, ҳеч иккиланмай шунисини харид қилаверинг, чунки бу хинанинг ўта янгилигидан далолат. Аксинча ҳолатларда эса, яроқлилик муддати ўтган ҳисобланади.

Меҳенди учун қоришмани ўзингиз ҳам уй шароитида тайёрласангиз бўлади. Бунинг учун хина кукуни, аччиқ қилиб дамланган ярим стакан қора чой, яримта лимон шарбати ва 2 ош қошиқ шакар керак бўлади. Чой, лимон шарбати ва шакарни аралаштириб, қуюқ қоришма бўлгунга қадар хина солинг. Тайёр меҳенди хинасини 20 дақиқа тиндиринг. Ана шундан сўнггина ишга киришинг.

Ўзингиз чизиб кўрмайсизми?

Меҳенди учун табиий, хафвсиз бўёқ хина ишлатилади. Тайёр хинали қоришмани косметик дўконлардан ёки хина билан чизувчи мутахассислардан харид қиласиз. Чизиш учун эса махсус конуссимон тюбик харид қилинг. Табиий хинадан тайёрланган қоришма терида тўқ жигарранг, сунъий бўёқлар билан аралаштирилгани эса очроқ ёки тим қора сурат ҳосил қилади. Шунинг учун хари қилишдан аввал уни қўлингизга суртиб кўринг.

Расм дарсидан аъло баҳога ўқимаганлар учун махсус таклифимиз бор: бир-биридан гўзал нақшлар акс этган трафаретлар дан харид қилинг-да, қўлингизни устига қўйиб гўзаллик яратинг. Агар ўзингиз чизишга киришган бўлсангиз, пахтали дисклар ёнингизда бўлсин. Тўсатдан, хато чизилган нақшни зудлик билан артиб ташлайсиз. Шунда унинг изи қолмайди. Меҳенди чизишга киришишдан аввал, терини лимон шарбати солинган илиқ сув ёрдамида тозалаб олинг, шунда тоза терига чуқурроқ сингиб, у муддат сақланади. Хина қотиб бўлганда, асал ва лимон шарбатини тенг микдорда аралаштириб, устидан суртинг ва бутунлай қуришини кутинг. Токи хина қолдиқлари теридан ўзи тушсин. Ана шунда нақшларингиз ёрқин ва жилвакор бўлади. 8 соат давомида меҳенди чизилган терига сув тегмаслиги керак.

 

Манба:  "Суғдиёна " газетаси

Орқага Чоп этиш