Кўз атрофи териси майин ва юпқа бўлиб, алоҳида парваришни талаб этади. Ушбу соҳага суртилувчи кремдан ташқари ҳафтада бир-икки марта махсус усуллардан фойдаланиш керак. Патч ниқоблари ана шундай пайтда ёрдамга келади. Бу яна нимаси бўлди экан, дейсизми? Дикқат қилинг, замонавий гўзаллик чораси билан таништирамиз!

»Кўз ости териси учун аппликация

Инглизчадан «ямоқ» деб таржима қилса бўладиган «раtch» сўзидан олинган бу ниқоб, кўз ости терисига қўйиш учун мўлжалланган бўлиб, унинг икки тури мавжуд: матоли ва гидрогелли. Икки тури ҳам фойдали моддалар, витаминлар, ўсимлик экстрактларига шу қадар тўйинтирилганки, ундан бир-икки маротаба фойдаланишингиз ҳамон терингиз намланганини ва майда ажинлар силлиқлашганини сезасиз. Натижа эса шишларсиз, қорайишларсиз, табиий ва дам олган кўз атрофи териси!

»Ўзингизга мосини танланг

Намлантирувчи. Тери қатламини намлик ва витаминлар жамланмаси билан тўйинтириб қолмай, майда ажинлардан ҳам ҳалос этади.

»Силлиқлаштирувчи. Ботокс вазифасини аъло даражада уддалайди. Гиалурон, коллоидли олтин ва коллагендан таркиб топган бу ниқоб тури кулиш, мимик ҳаракатлар натижасида пайдо бўлган ажинларни силлиқлаб, терини текислайди.

Озиқлантирувчи. Терингизни комплекс даволашни истасангиз, қиммат бўлса ҳам патчнинг шу турини танланг. Унинг таркибида ретинол ва ўсимлик экстрактлари мавжуд.

Ёшартирувчи ва тикловчи. Ушбу ниқоб тури учун махсус формула ишлаб чиқилган. Унга асосан, ниқоб пептидлар, коэнзим, коллаген, женьшень, балиқ увилдириғи экстракти ва сув ўсимликларидан таркиб топган. Ёш кўриниш истагидагилар учун ниқоб айни муддао.

»Қарши кўрсатмалар

Аллергик конъюнктивит, тери яралари, ёриқлар мавжуд бўлганида аввал уларни муолажа қилиб, сўнг ниқобдан фойдаланиш керак. Ниқоб таркиби турли хил компонентларга бой, шу боис аввал унинг бир учини қўл терисига ёпиштириб, аллергик таъсирларга синалма ўтказинг.

»Гидрогелми ёки мато?

Патчларнинг гидрогелли тури денгиз ўсимликларидан олинган табиий полимердан тайёрланган бўлиб, таъсир кучи жуда тез ва самаралидир. Ингичка желесимон ниқоб, терига шундай ёпишадики, ўзидаги барча фойдали компонентларни терига чуқур сингдира олади.
Ҳали ажин нелигини билмайдиган ёш қизлар учун эса матоли ниқоблар айни муддао. Табиий пахтадан тайёрланган бундай ниқоб, нам салфеткани эслатади. Гидрогелли ниқобдан фарқи, уни ишлатиб бўлганингиздан сўнг терингизда ёпишқоқликни ҳис этасиз, негаки, барча моддалар тўлиқ сингмайди. Шундай бўлса-да, эпидермиснинг юқори қатлами патчдаги барча фойдали моддаларни қабул қила олишга қодир.

»Қандай фойдаланамиз?

Аввалдан тозалаб олинган кўз атрофи терисига ярим ой кўринишидаги ниқобларни ёпиштириб, 15-20 дақиқага қолдирасиз. Кўз атрофидаги қорайишлардан халос бўлиш учун эса 30 дақиқага қўйиш тавсия этилади. Бу вақт ичида ниқоб терингизга барча фойдали моддаларни сингдиришга улгуради.

Кўзингиздаги енгил ҳорғинликдан халос бўлиш учун ниқобни истаган пайтда, ҳафтада бир марта ишлатишингиз мумкин. Ажинларнинг ёзилиши ва кўз атрофи терисидаги муаммоларни ҳал этишда эса бир ой давомида, ҳафтада икки марта ниқобдан фойдаланиш маслаҳат берилади. Ниқоб чуқур жойлашган ажинларни кетказолмайди, у фақат майдалари билан курашади, холос.

20-30 ёшлар оралиғидаги қиз-аёллар учун намлантирувчи ва озиқлантирувчи ниқоблар мос келса, 30 дан ошган хонимларга Q 10 ва коллагенли турлари тавсия этилади.