ru uz
Куйгандан кейинги доғлар ....

Муҳими, тўғри ёрдам бериш

Орамизда бир марта бўлса ҳам куйишдан азият чекмаган аёл топилмаса керак. Айниқса, ошхонада куймаланадиган опа-сингилларимизнинг тез-тез дуч келадиган нохушлиги бу. Лекин бир қарашда арзимагандек кўринган кичик куйиш ҳам баъзида доғ ва чандиқларга сабаб бўлади. Жароҳатнинг енгил (1-2-даражали) турларида биринчи ёрдам ва даво чоралари тўғри кўрсатилса, кейинчалик терида доғлар пайдо бўлишининг олдини олиш мумкин. Бунинг учун эса биринчи навбатда терини совитишга ҳаракат қилиш даркор. Совуқ сув ёки намланган пахтали мато ёрдамида. Агар қўл остингизда махсус куйишга қарши тиббий спрей ёки салфеткалар бўлса, улардан фойдаланишингиз мумкин. Зарурат туғилса, шифокорга мурожаат қилиш тавсия этилади. Аммо куйган терига ёғ суртиш қатъий тақиқланади. У терининг устки қаватида плёнка қатламини ҳосил қилиб, иссиқликнинг чиқиб кетишига тўсқинлик қилади. Натижада тери янаям чуқурроқ куя бошлайди. Тери бироз тинчланиб, юзасида қобиқ пайдо бўлганидан кейин эса шифокор тавсиясига кўра, суртма дориларни қўлласангиз бўлади.

Кимёвий пилинг

Агар кўрган чораларингизга қарамай терингизда доғлар юзага келса, бугунги кунда уларни кетказишнинг бир қанча самарали усуллари мавжуд. Шулардан энг кенг тарқалгани кимёвий пилинг саналади. Доғнинг катталиги, рангининг тўқлигига қараб мутахассис муолажанинг юзаки, ўрта ёки чуқур турларидан бирини танлаши мумкин. Бироқ бу усул яраси битган теригагина қўлланилади.

Чандиқлар энди кетмайдими?

Агар бемор 3-4-даражали куйишдан азият чеккан бўлса, терининг тикланиши бироз мушкул кечади. Ва унда турли чандиқлар юзага келиши мумкин. Лекин замонавий тиббиёт бу масаланинг ҳам ечимини топган. Мутахассислар чандиқларнинг катта-кичиклиги, жойлашган ўрнига қараб ёки лазерли сайқаллаш, ёки пластик жарроҳлик усулига мурожаат қилишни тавсия этадилар. Бу босқичда рекламаларга учиб, турли суртма ва гелларни харид қилманг. Улар натижа бериши даргумон.

Лазерли сайқаллашда тери тозалангач, махсус крем суртиб, лазер нурлари билан ишлов берилади. Нур таъсирида тери куйиб, қизаради, яралар ҳосил бўлади. Аслида, муолажанинг асосий мақсади ҳам эски, зарарланган теридан тезроқ қутулиб, янги ва текис тери чиқишини рағбатлантириш ҳисобланади. Маълум вақтдан сўнг куйган тери шилиниб туша бошлайди ва остидан янги тери чиқади. Амалиётдан сўнг мунтазам равишда махсус кремлардан фойдаланиш лозим. Сайқаллашдан кейин 7 кун давомида уйдан чиқмаслик, ультрабинафша нурларидан эҳтиёт бўлиш талаб этилади. Умуман амалиётни куз ойларининг охирига мўлжалласангиз, адашмайсиз. Ҳа, кўзланган натижага эришиш учун етти-саккиз бор муолажа қилишга тўғри келади.

Пластик жарроҳлик усулида терининг бутунлигига зиён етказилгани боис тиғ теккан терида чандиқ қолади, албатта. Фақат тажрибали мутахассис уни имкон қадар кўринмайдиган қилиб яширишга ёрдам беради. Баъзи ҳолларда янада яхши натижага эришиш учун аввал пластик жарроҳлик, кейин лазерли сайқаллаш усуллари биргаликда қўлланилади. Бунда ҳам кўп нарса чандиқнинг ҳажмига боғлиқ.

Орқага Чоп этиш