ru uz
Бариатрия - семизлик муаммосига жарроҳлар аралашуви

Ортиқча вазн кўпчиликни ташвишга солаётган муаммолардан бири десак, янглишмаймиз. Ундан халос бўлиш учун ҳар хил парҳезлар, махсус спорт машғулотлари, ноодатий тиббий муолажалар, турли препаратлар, иштаҳани бўғиш усулларидан фойдаланаётганлар, ҳатто, руҳшунос хизматига ҳам мурожаат қилаётганлар бор орамизда. Ортиқча вазн соғлиққа жиддий зиён етказганида эса шифокорлар жарроҳлик амалиётига мурожаат этишни тавсия қилишлари мумкин. Келинг, шу усулга батафсил тўхталсак.

Жарроҳларга йўл беринг

Бариатрия - семизлик муаммосига жарроҳларнинг аралашуви билан кечувчи жараён. Амалиёт жарроҳлар ҳамда эндокринологларнинг қатьий кўрсатмалари асосида амалга оширилади. Хўш, бу тиниб-тинчимаган жарроҳлар қай йўл билан бизни муаммодан халос этишади?

  • Ошқозонни қисман боғлаш (бандажлаш);
  • . ошқозонга шунт қўйиш (найча ўрнатиш);
  • билиопанкреатик шунт қўйиш;
  • гастропластиканинг турли кўринишлари;
  • ошқозоничи баллони ёрдамида.

Кимларга буюрилади?

Агар беморда куйидаги белгилар кузатилса, бариатрияга кўрсатма берилиши мумкин:

  1. Тана вазни индекси 35 ва ундан юқори бўлса (махсус жадвалга қаралади),
  2. Вазн ошишига сабаб бўлувчи касалликлар мавжуд бўлса.
  3. Терапевтик муолажа усулларига нисбатан рефрактерлик (салбий таъсир) кузатилса.

3 тури мавжуд

Бариатрик жарроҳликни 3 гурухга ажратиш мумкин:

  1. Рестриктив жарроҳлик - ошқозон-ичак трактининг юқори соҳасини қисқартириш йўли билан камроқ таом тановул қилишга кўмаклашиш (ошқозоничи баллони, ошқозонни бандажлаш).
  2. Ошқозон-ичак трактида вазнни оширувчи моддаларнинг кам сўрилишини таъминловчи жарроҳлик амалиёти тури (билиопанкретик шунт қўйиш).
  3. Аралаш жарроҳлик — бунда бирваракайига ҳар усулга мурожаат қилиниши мумкин.

Қарши кўрсатмалар

Жарроҳлик амалиётини ўтказиш мумкин бўлмаган холатлар мавжуд: Булар:

  1. тана оғирлиги индекси 35 дан кам бўлса;
  2. ҳомиладорлик ва эмизиш даври;
  3. анамнез ҳолатидаги руҳий касалликлар;
  4. мурожаат даврига қадар, 6 ой давомида ўтказилган юрак ишемик касалликларининг оғир шакли.

Адаштирманг, липосакция бошқа нарса!

Алоҳида таъкидлаб ўтиш лозимки, липосакция ва абдоминопластика бариатрик жарроҳлик тури ҳисобланмайди.

Қай усул самаралироқ?

  • Бандажлашда ошқозоннинг юқори қисми сиқилади ва думалоқ силикон боғлам кийдирилади. Бу анчайин хавфсиз ва тезкор усул бўлиб, ортиқча вазнинг 50-60 фоизга камайишига олиб келади.
  • Нокли гастропластикада ошқозоннинг каттагина қисми олиб ташланади. Қолган бўлагидан эса диаметри 1 см.ли найча ўрнатилади. Бунда овқат ошқозонга жуда кам миқдорда тушади.
  • Шунт қўйилганида эса ошқозон икки қисмга ажралиб қолади. Кичкина қисмининг ҳажми 50 мл.ни ташкил этади. Натижада, бемор жуда кам микдорда таом истеъмол қилишга одатланади. Қолаверса, озиқ моддалар кам миқдорда сўрилади. Шунт қўйиш муаммонгизни 80 фоизгача камайтиради.
  • Билиопанкреатик шунт қўйишда қисқичлар ёрдамига мурожаат қилинади. Бунда кичрайтирилган бўлмага ингичка ичак бирлаштирилади. Бу усулнинг оддий шунтлашдан асосий фарқи ошқозон бўлмаси ҳажми 50 мл. эмас, 200 мл.ни ташкил этиб, ингичка ичак йўли қисқартирилади ва 50 см.га яқин узунликда қолдирилади. Озиқ моддалар жуда кам миқдорда сўрилгани боис 90 фоизлик натижага эришишингиз мумкин.

Амалиётдан сўнг

Гастро ва билиопанкреатик шунт қўйилганидан сўнг ҳаёт учун муҳим саналган В гуруҳи витаминлари, фолат кислотаси, темир, кальций ва микронутриентлар истеъмоли етарли даражада бўлишини назорат қилиш лозим. Амалиётдан кейин махсус парҳез, кундалик енгил жисмоний машқларни бажариш, доимий шифокор назоратида бўлиш талаб этилади.

 

 

Орқага Чоп этиш