ru uz
Қулупнай мавсумини очиқ деб эълон қиламиз

Баҳорнинг ушбу эркатой мевасига она табиат бор меҳрини берган десак, адашмаймиз. Кўплаб витаминлар, минераллар, макро ва микроэлементлар билан тўйинган кулупнай бежизга биринчи бўлиб етилмайди, ахир. Ёқимли ифорининг ўзи ёки биргина кўриниши кайфиятни кўтаришига аҳамият берганмисиз? У нафақат дастурхонимиз кўрки ёки ширин десерт, балки кўплаб касалликларга даво, профилактика воситаси, аёлларнинг гўзаллик ва чиройли қоматига ижобий таъсир кўрсатувчи сеҳрли таёқча ҳамдир.

Таркибини ўрганамиз

Таркибидаги ретинол (А витамини) яллиғланишга қарши курашади, терини майинлаштиради, ажиларни текислайди ва кўриш қобилиятини яхшилайди.

Фолий кислотаси (В9 витамини) аёллар репродуктив саломатлигига таъсир кўрсатади, ҳомиладорликни режалаштиришда аҳамияти катта, ахир бу витамин боланинг асаб тизими шаклланишида иштирок этади. Аскорбин кислотаси (С витамини) эса қулупнайда лимондан ҳам кўпроқ микдорда эканлиги исботланган, у иммунитетни мустаҳкамлайди, кайфиятни кўтаради, ортиқча вазн муаммосида ёрдам беради. Терини намлантиришда эса калий ва магний моддаларига етадигани йўқ. Қолаверса, бу моддалар юрак фаолиятини яхшилайди, қон босимини бир меъёрда ушлаб туради, организмни кислород билан тўйинтиради. Клетчатка эса ичак ҳаракатини яхшилайди, қабзиятни даволашда ёрдам беради, организмни ортиқча тиқин ва зарарли моддалардан тозалайди.

Ҳомиладорларга мумкинми?

Ҳомиладор аёл аллергияга мойил бўлмаса, қулупнай унга кони фойда эканлиги ҳақида гапирдик. Айниқса, бу нозик паллада учраб турадиган қабзият муаммосининг олдини олиши аҳамиятли. Яна ўша аллергия сабаб педиатрлар ёш болаларга қулупнай беришда шошилмасликни маслаҳат берадилар. Аллергияга мойил бўлмаган болаларга 2 ёшдан кўпи билан кунига 7—8 донадан (энг мувофиқ миқдор эса 6оланинг кафтига сикқунча) яхшилаб ювиб, янгилигига ишонч ҳосил қилган ҳолда беришдир. Қулупнай 2 кундан сўнг эскириб қолишини инобатга олиб қўйинг. Эски мева эса ошқозонда бижғиш жараёнини бошлаб, заҳарланишга олиб келади. Шундай экан, кўзлари мунчоғингизга бу мевани беришда эътиборлироқ
бўлинг. Ўзимизда етиштирилган маҳаллий навлар четдан келтирилганларидан анча хавфсиз, кимёвий моддалардан холи, энг асосийси, янги ва мазали эканлигини айтмасак ҳам яхши биласиз, тўғрими?

Энг яхшисини танланг

Яхши қулупнай танлаш сиздан озгина эътибор ва сезгирликни талаб қилади. Супермаркет ва бозорларимиздаги танловни кўриб бошингиз айланиб қолмасин тағин. Меҳнаткаш бободеҳқонларимиз етиштирган қулупнайларнинг бари сархил ва мазали, фақат унинг янгилигига, лой тегмаганига ишонч ҳосил қилинг. Яхши қулупнайни ҳидидан танийсиз, қолаверса, у ўзидан тиниқ рангли шарбат чиқаради.

Пилинг ўрнини босади

Қадимда ҳинд маликалари ундан юз терисини оқартирувчи восита сифатида фойдаланишган бўлишса, римлик гўзаллар тишни оқартириш ва сочга жило бағишлашда қўллашган. Таркибидаги кислоталар сабаб қулупнай ажойиб пилинг ҳисобланади. Айниқса, турли доғларни бартараф этишда унинг олдига тушадигани кам учрайди. Оқартирувчи ниқобни тайёрлаш учун 3—4 дона қулупнайни яхшилаб эзиб, 1 чой қошиқ сметана ёки қатиқдан аралаштириб, юз терисига суртинг. 15 дақиқадан сўнг илиқ сув билан ювиб ташланг. Сўнгра намлантирувчи кремдан фойдаланиш ёддан чиқмасин.

 

 

Манба:  "Суғдиёна " газетаси

Орқага Чоп этиш